വൃത്തിയാക്കല്‍

പഴയ

കെമിസ്ട്രി പുസ്തകം,

പേജ് നമ്പര്‍ നൂറ്റിയേഴ്,

ആവര്‍ത്തന പട്ടികയോടൊട്ടി

മരവിച്ചു കിടപ്പുണ്ടായിരുന്നു

അവള്‍ തന്ന പ്രണയലേഖനം.

ചോക്കുപൊടി-

മേത്തു പറ്റിച്ചതെന്തിനാണെന്ന്

ചോദിച്ചിരുന്നതില്‍,

നീല വരയന്‍ ഷര്‍ട്ടെനിക്കിണങ്ങുന്നില്ലെ-

ന്നൊരു പരാതിയുമുണ്ടതില്‍.

കൊഞ്ചലുണ്ടതില്‍ - കവിതയുണ്ടതില്‍

പാതിരാകനവുകണ്ടൊരു പെണ്ണിന്റെ

ഹൃദയമുണ്ടതില്‍.

കണ്‍മഷിയെഴുതിയ

കണ്ണിന്റെ - കുറുമ്പിന്റെ

തിളക്കമുണ്ടോരോ വരിയിലും

അവസാന മഴയും

ഒരുമിച്ചലിയാനാശിച്ച

പ്രണയമുണ്ടോരോ വാക്കിലും

ഇന്ന്

പഴയ സാധനങ്ങളൊക്കെയും കത്തിച്ച്

സ്ഥലമുണ്ടാക്കുകയാണെന്റെ ഭാര്യ

പഴയ കെമിസ്ട്രി പുസ്തകം

കൈയില്‍ പിടിച്ചു ഞാന്‍

തീയില്‍ ചവിട്ടി നിന്നിട്ടും -

കാല്‍ പിന്‍വലിച്ചില്ല.